Танымал ресейлік хирург қазақстандық 13 балаға ота жасады
Ақтауда Ресей медициналық академиясының үздіксіз кәсіби білім беру бөлімінің балалар хирургиясы кафедрасының меңгерушісі, медицина ғылымдарының докторы, профессор Юрий Соколов 13 балаға күрделі туа біткен ақаулары бойынша ота жасады. Пациенттерге арналған емдеу «Жұлдызай» Корпоративтік Қорының Mumkindik менторлық жобасы аясында тегін жүргізілді. Бұл күрделі оталар қазақстандық хирургтарға арналған шеберлік сабақтарымен қатар өтті. Шеберлік сабақтары барысында жергілікті мамандар инновациялық әдістерді меңгеріп, тәжірибе алмасып, біліктіліктерін арттырды.
Оталар Маңғыстау облыстық көпбейінді балалар ауруханасының базасында өтті. Шеберлік сабақтарына Қарағанды, Түркістан және Маңғыстау облыстарынан келген дәрігерлер қатысты. Қазақстандық хирургтар алғаш рет балалардағы даму ақауларын эндовидеохирургия әдістерімен емдеуді үйренді.
Айта кетейік, 2023 жылы Mumkindik бағдарламасы аясында 86 технологиялық ота жасалып, 204 бала әлемдік деңгейдегі мамандардан кеңес алды. Жобаны BI Group құрылыс холдингі мен оның қызметкерлері қолдайды. Бұл материалдық қолдау шетелдік профессорлардың жалақылары мен барлық шығындарын өтейді.